ملوانكه‌یه‌ك تیرۆژه‌ چیرۆك | نه‌وزاد ئه‌حمه‌د حسێن

نوسینى : نه‌وزاد ئه‌حمه‌د حسێن (نه‌وزاد به‌ندى )

(1)
(كچه‌كه‌م )
دوو رۆژ بوو له‌ قوتابخانه‌ ناونووسم كردبوو ، سێیه‌م رِۆژ جانتاكه‌ى هه‌ڵئاوسا بوو ، ته‌ماشام كرد ؛ یه‌كپارچه‌ وورده‌ ته‌باشیره‌ ..
-( بووم به‌ موراقیب .. ئه‌گه‌ر برِوایش ناكه‌ى ، ئه‌وه‌ ته‌خته‌سرِه‌كه‌یه‌ .. !

(2)
(ته‌خته‌ سرِ )
پێمان ئه‌ووت نه‌وه‌ شه‌ل ..وانه‌ى فیزیاى پێده‌ووتین ، زه‌رده‌خه‌نه‌ى قوتابیه‌كى بینى ..
-( وه‌ره‌ ده‌ره‌وه‌ )
زه‌رده‌خه‌نه‌كه‌ له‌به‌رده‌م ته‌خته‌ رِه‌شه‌كه‌دا مرد
-(بۆچى پێده‌كه‌نیت ؟؟ )
-(................... )
-(پشت ملت بێنه‌ .. !)
ته‌پ و تۆزى ته‌خته‌سرِه‌كه‌ى ته‌كانده‌ پشت ملیه‌وه‌

(3)
(پشت مل )
ئێواره‌یه‌كى ساڵى 1986 به‌ به‌رده‌ركى سه‌رادا ئه‌رِۆیشتم ، باسى كچێكى توركمانم بۆ هاورِێكه‌م ده‌كرد كه‌ له‌ به‌شى جوگرافیا ئه‌خوێنىَ و .. به‌ رِێكه‌وت له‌ تێرمیناڵى باكوور له‌ موسڵ بوو بوو به‌ هاورِێم ..
كاتێكم زانى پشت ملم به‌ ده‌ست پۆلیسێكه‌وه‌یه‌ ..
-( رِاوه‌سته‌ .. قورِمساغ .. )
ئاماژه‌یه‌كى بۆ كردم كه‌ بچمه‌ ژووره‌وه‌ ..
كه‌ چوومه‌ چووره‌وه‌ ، بێجگه‌ له‌ خۆم هه‌ژده‌ كه‌سى تریش پشت ملیان گیرا بوو ..
تاوانه‌كه‌یشمان بریتى بوو له‌ هێشتنه‌وه‌ى رِیش .. !

(4)
(رِیش )

كه‌ ئه‌یهێڵمه‌وه‌ ، ئه‌مگرن ..كه‌ ئه‌یتاشم ، خۆم زامدار ئه‌كه‌م .. نازانم چى بكه‌م ..
هاورِێكه‌م كه‌ له‌ خۆم به‌ ئه‌زمونتر بوو ، ووتى :
_( له‌ نێوان هه‌ردووكیاندا ؟؟ )
-( مه‌به‌ستت چیه‌ ؟؟ )
-(سه‌كسوكه‌ بهێڵه‌ره‌وه‌ .. )

(5)
(هێشتنه‌وه‌ )
داواكارى كورِان بۆ ژن هێنان ، ئه‌هێڵرێته‌وه‌ ، بۆ چه‌ندین جار ، بۆ ئه‌وه‌ى كچه‌كه‌یان قورس رِابگرن ..قوتابیان له‌ شه‌شى ئاماده‌ییدا خۆیان ئه‌هێڵنه‌وه‌ بۆ ئه‌وه‌ى نمره‌ى به‌رز بهێنن .. من دواى ته‌واو بوونى وانه‌كانى زانكۆ خۆم له‌ هۆڵه‌كه‌دا ئه‌هێشته‌وه‌ بۆ ئه‌وه‌ى دوو قسه‌ى نهێنى له‌گه‌ڵ ئه‌ودا بكه‌م .. هێشتنه‌وه‌ى شیش بۆ نهۆمێكى تر ..هێشتنه‌وه‌ى نه‌فه‌رێك له‌ بازگه‌ سیاسى_عه‌سكه‌ریه‌كانى رِۆژهه‌لاَتى ناوه‌رِاستدا ، به‌ مه‌به‌ستى پاراستنى ئه‌منى قه‌ومى .. !
هێشتنه‌وه‌ زۆرن .. ئه‌وه‌ى ناهێڵرێته‌وه‌ ، ته‌نها رِه‌ورِه‌وه‌ى كاته‌ ..

(6)
(كات )
-(فێرى كاتژمێرم بكه‌ .. )
-(جارىَ فێر نه‌بیت باشه‌ .. )
-(بۆ ؟)
_(ئه‌وه‌نده‌ت خۆشه‌ كه‌ فێر بوویت ، ئیتر بۆت ده‌رئه‌كه‌وىَ كه‌ ته‌مه‌ن و جگه‌ره‌ جیاوازییان نیه‌ .. )
-(هه‌ر ئه‌بىَ فێرم بكه‌ى .. )
ناچار ده‌ستم كرد به‌ باسكردنى میله‌كانى كاتژمێر بۆ كچه‌كه‌م ..

(7)
(كچه‌كه‌م )
برِوانه‌ بۆ چیرۆكى یه‌كه‌م
 

بۆچوون نووسین

ناردنی ئه‌م بابه‌ته‌ بۆ هاوڕێیه‌ك