ڕۆمانەكان چۆن ئەكرێنە كوردی | محه‌مه‌د حسێن

لە پەراوێزی وەرگێڕانە ئەدەبیەكاندا

 رۆمانەكان چۆن ئەكرێنە كوردی

 لەوانەیە ئەمڕۆ لەهەمەموو كاتێك گونجاوتر بێـت بۆ گفتوگۆی  كێشەو و ئاستەنگیەكانی وەرگێڕانی ئەدەبی , یاخود ئاوڕدانەوە لەو دەقانەى بەزمانەكانى تر نوسراوەو ئێمە بەكوردی ئەیخوێنینەوە , چونكە  ژمارەى ناونیشانی كتێبە وەرگێڕراوەكان بەڕەوت و خێراییەكی  باشەوە ڕۆژانە لە  بازاڕى كتێبفرۆشیەكاندا زیادئەكات , هاوكات  ژمارەى ئەو كەسانەیش بی َهیچ پێشینەو ئەزمونێكی كارى وەرگێڕان لەم ساڵانەى دوایدا دەستیانداوەتە وەرگیڕانی ئەدەبی بەگشتى و ڕۆمان بە تایبەتی . بێگومان پرسیارى ئەوەى ئەم جۆرە وەرگێڕانە چی پێ بەخشیوین ؟ چەند شاكارى جوانی خستۆتە سەر رەفەى كتێبخانەكانمان و تا چەندە ئاشناى كردوین بەئەزمونی نوسەرانێكی تر كە لە سیاق و شوێن و كاتێكی جیاوازدا نوسیویانە  ؟ پێداویستیەكی مەعریفی ئەمڕۆى ئەدەبی كوردیە . چونكە هەر تەماشایەكی سەرپێى  ئەو خەرمانە ئەدەبیەى  لە فەرهەنگ و زمانە جیاوازەكانی جیهانەوە كراوەتە كوردی  هاندەرێكی باشە بۆ دەست پێكردنی گفتوگۆیەكی لەم جۆرە , خۆشبەختانە ئەم بوارەى ئەدەبی كوردی ئەمڕۆ لەهەموو كات و سەردەمێكی تری پڕ بەرهەمتر و بە بڕشت ترە ,  بەڵام ئەم بڕشت و پڕبەرهەمیە هەر وا بێ گرفت وكەمو كوڕی نیە , كەم نین ئەو دەقانەى لەوەرگێَڕانیدا بەڕاستی مافی خۆى پێنەدراوە , لەجیاتی ئەوەى بكرێتـە كوردی , (هەڵپڕوسكێنراوەتە ) سەر زمانی كوردی . دیارە ئەمە هەركێشەى ئێمە نیە بە تەنها  , بەڵكو كێشەى هەموو فەرهەنگ و كەڵچەرە زیندوەكانی  جیهانە , تا وەرگێڕاینش بمێنێـت ئەم كێشانە هەر بەردەوام ئەبن و هەمیشە  ڕوبەڕوی چەند پرسێكی ترى وابەستە ئەبنەوە , وەك ئەوەى :- كێ و چ دەزگایەك مافی دیاریكردنی پاكى و دروستى بەرهەمێكى وەرگێڕراوى هەیە  ؟ چی بكرێت بۆ ئەوەى وەرگێڕانی جوان و داهێنەرانە جیابكریـَتەوە لەو كارانەى كە بەڕاستی قەیرانێكی بۆ دەقەكە دروستكردووە  ؟  یان بەدەرلەوەى تا ئێستا وەرگێڕراوەتە سەر زمانی كوردی  , كێ دێـت بۆ ئەوەى پێشنیار و دەرخستەى ئەو بەرهەمانەمان بداتێ  كە  پێویستە وەربگێڕرایە و هێشتا كەس دەستى بۆنەبردووە , كێن ئەوانەى سیاسسەتی ڕۆشنبیرى وڵاتەكە دائەڕێژن و بزوتنەوەى وەرگیڕان بە جۆرێك  ئاراساتە ئەكەن تا ببێتـە تەواوكەرێكی ترى پرۆژەى گەشەپێدانی مرۆیى و ڕۆشنبیرى وڵاتەكە بەگشتى ..  ئەشێت هەموو ئەم پرسانە بەشێك بن لەو تەوەرانەى كە لە  هەرگفتوگۆیەكی تێرو پڕ لەگەڵ وەرگێڕانی ئەدەبیدا بكرێت .. بەڵام ئەم نوسینە تەنها پرسی ( بەكوردیكردنی ) دەقەكان وەرئەگرێت , یاخود تەنها ئەوبەشەى كردەى وەرگێڕان گفتوگۆ ئەكات , كە دواین وێستگەى كارەكەیەو خۆى لە (كوردانە داڕشتنەوەى دەقەكە) دا ئەبینێتەوە , بۆ وەرگیڕانی  دەقى ئەدەبیش ئەم پرۆسەیە ڕۆڵ و گرنگیەكی زۆرى هەیە , چونكە بە شێوەیەكی راستەوخۆ ئەدەب  لەگەڵ خەیاڵ و زەوق و ئاستی چێژبینین و سایكۆلۆجیاى وەرگرتندا دەرگیرە , هەر گرفتێكی ستاتیكی لەداڕشتنەوەو ( بەكوردی كردنی ) دەقێكدائەشێـت لە هەموو ئەم بوار و ئاستانەدا كاریگەرى هەبێت و ببێتە هۆى تێكدانی ئەو پەیوەندی و كەمەندكێشیەى پێویستە خوێنەر بە دەقی ئەدەبیەوە گرێ بدات , ئەنجامە سروشتى و چاوەڕوانكراوەكانی كێشەیەكی وەهایش هەمووجارێك بەمەرگی ئەم پەیوەندیە كۆتایى دێت , كە ئەشێـت هەم بە تۆراندن و هەم بە فڕاندنی خوێنەریش ناودێرى بكەین .

 بۆ وەرگێڕ , هەرچەندە زمانزان بێت , شارەزاى بوارەكەو خاوەن سەلیقەى زمانەوانی بێت , وەرگیڕانی ئەدەبی , یاخود گواستنەوەى شیعریەتی زمانی دەقێك كە لە زەمین و كات و كۆنتێكستێكی جیاوازدا نوسراوە كارێكی پڕمەینەتی و سەرئێشەیە , لە دواى هەموو ( لێزانی و شایستەیى و تواناكانی ترى وەرگێڕ ) تاقەت و حەوسەڵەو زەوقێكی لەبارى ئەوێت ,  هەر ئەم هەستیاریە زیاد لە پێویستەیە واى كردووە تیۆریسازێكی  وەك ( جیرار جنیت ) لە كتێبی ( لاپەڕەكان) دا لەبارەى وەرگێڕانی ئەدەبیەوە بڵێت "باشتر وایە بۆ وەرگێڕ بێ هیچ گومان و دودڵیەك ئەوەى قبوڵ بێـت كە ئەو بەكارێكی پڕ زیان هەڵئەسێت , بەڵام لەگەڵ ئەمەیشدا هەوڵبدات بە باشترین شێوە ئەنجامی بدات , وەك ئەوەى كە شتێكی تر دابهێنێت " , كەواتە هەرلەسەرەتاوە وەرگێڕانی ئەدەبی بۆخۆی كارێكی پڕتەنگ و چەڵەمەیە , كەم جار ڕێ ئەكەویـَت ئەو كەسانەى كارى لەسەر ئەكەن  , لە ئەنجامدا بەرهەمێكی جوانمان پێش كەش بكەن , چونكە پاراستنی دەقێكی ئەدەبی لەم پرۆسەى گواستنەوەدا , بەهۆى رەچاوكردنی كۆمەڵێك ڕێساو ڕێوشوێنەوە ئەبیت كە پەیوەندیان بەزمانزانینەوە نیە , ئەوەندەى كە پەیوندی بە سەرلەنوێ خوڵقاندنەوەى بابەتەكەوە هەیە بەگشتى , دیارە ئەمەیش پرۆسەیەكی سۆزداریە پێش ئەوەى عەقڵانی بێت , ئەدەبیە زیاتر لەوەى كە زمانەوانی بێت , پێویستی بەهەموو هەستیارى و زیرەكی وبەهرەكانی وەرگێڕ هەیە وەك چۆن بیەوێت خۆى دەقێكی وەها  بنوسێت . كەواتە - وەرگێڕى ئەدەب - پێویستە كرۆك و ئەتمۆسفێرى گشتى دەقەكە بگوزاێتەوە , نەك ئەو وشانەى كە هەڵگرى واتایەكی فەرهەنگین , چونكە هەمیشە دەقى ئەدەبی , بەوناوكۆییە زمانەوانی و مەعریفی و و سۆزداری و شیعریەى  وشەكانی تیا ئەخاتە گەڕ , بۆ هەموو وشەیەك واتاى خوازراوى خۆى هەیە , ئەگەر وەرگێڕ وریا و بەسەلیقە نەبێت ئەم بوارى وشەو میتافۆرە هەمیشە تەڵەزگەى هەڵەكانی ئەو دەبێت . ئێستاكە بابپرسین ئایا ئەم هەموو گرفت و ئاڵۆزیانە بۆ هەموو وەرگێڕێك قابیلى تێگەیشتنە ؟ بەدڵنیاییەوە نەخێر ..

   باوەڕێكی زاڵ و باو هەیە كە پێی وایە وەرگێڕانی پاك و دروستى دەقێكی ئەدەبی زۆر زەحمەت و مەحاڵە  , قەت بڕواى بەوەرگێڕانێك نیە كە بەشێكی ( جوانی و واتا و خەیاڵى ) تێكستەكەى لەدەست نەدابێت , بەڵام كە ڕۆمانێكیش ئەكرێتە كوردی دورنیە هەر یەكە لە ئێمە بە تامەزرۆیى و چڵێسیەكی بێ ئۆقرەوە حەزبكەین  بەر لە هەموو خوێنەرێكی تر بیخوێنینەوە , چونكە  قەت ناشێـت بەدگومانیمان بەرامبەر خراپ وەرگێڕان وامان لێبكات سڵ لە ئەدەبی وەرگێڕراو بكەینەوە , ئەگەر ئەدەب وەرنەگێڕرێـت ئەوا بێ ئاگا ئەبین لە بەشى هەرە زۆرى بەرهەمی فەرهەنگ و زمانە جیاوازەكانی دنیا , چونكە هەموكەسێك تەمەن و توانایەكی سنوردارى هەیە بۆ ئاشنا بون بەزمان و فەرهەنگی میلەتانی تر , ئەگەر بەتەما بین هەمیشە لە ڕێگاى زمانی یەكەم و ڕەسەنەوە دەقەكان بخوێنینەوە , ئەوا بەدڵنیاییەوە چیرۆكی تەمەنمان كۆتایى پێ دیـَت بێ ئەوەى لانی كەمی ئەو دەقانە بخوێنینەوە كە بە وەرگیڕان ئەشێت دەرفەتی خوێندنەوەیمان بۆ بڕەخسێت  , هەربۆیە تا ئارەزوی خوێندنەوە بمێنیـَت وەرگێڕانی ئەدەبیش هەر وا دەمێنێت .

 دیارە ئەوەى لەم نوسینەدا بەرامبەر كردەى وەرگێڕان دەیوروژێنرێت پرسیارگەلێكى پیشەیى نین لە هیچ وەرگێڕێك , ئەوەندەى كە چاوەڕوانیەكی تامەزرۆیانەیە لەو تێكستانەى ئەكرێنە كوردی , چونكە بۆ ئەوەى دروستى و پاكی تێكستێكی وەرگێڕراو بدۆزینەوە پێویستمان بە بینینى هەردوو دەقى رەسەن و وەرگیڕراوەكەیش هەیە , كات و وردەكاریەكی زیاتریش بۆ پیاچونەوەى پرۆسەى وەرگێڕانەكە ..., بەڵام ئەوەى ئێستا  گفتوگۆى ئەكەین ئاستی (بەكوردیكردن ) ی دەقەكەیە , ئەو لێزانی و تواناو سەلیقەیە وەرگێڕ بۆ بە كوردی داڕشتنەوەى دەقەكەى بەكارى بردووە  . هەموو وەرگێڕێك دواى خوێندنەوەو تێگەیشتن و دوبارە خوێندنەوە دەقێك ئەكاتە كوردی , هەموو باش تێگەیشتنێك و باش خوێندنەوەیەكیش بەسە بۆ ئەوەى دەقێكی پێ بكرێتە كوردی , بەڵام هەموو بەكوردی كردنێك بەس نیە بۆ ئەوەى دەقێكی جوان و پڕ چێژى ئەدەبی ببەخشێتە خوێنەرەكەى .. ئەم بەكوردیكردنە لاى دەقە ئەدەبیەكان , لێزانی و هونەرمەندیەكی زیاترى ئەوێـت لە  وەرگێڕان لە هەر بوارێكی ترى زانستی و فكرى و ...هتد

  بۆنمونە , ئەگەر وەرگێڕێك توانى رستەیەكی هەواڵی بگوازێـتەوە بۆ سەر زمانی كوردی , ئەوا مەرج نیە ئەو دنیابینی و خەیاڵ و مێنتاڵیتی و هەست و نەستەى ئەم رستەیە بەزمانە رەسەنەكەى خۆى هەلگریەتی بەئاسانی بگوزارێتەوە سەر زمانی كوردی .. چونكە بەكوردی كردنی دنیابینی كردەیەكی زۆر زەحمەتترە لەوەى هەر بە ( وەرگێڕانێكی ئاسایى ) بكرێت , , ئەم گرفتە لە دەرەوەى پرۆسە زمانەوانیەكان  و واتا فەرهەنگیەكانی وشەكاندایە ,  وەك ئەوەى مۆنان ئەڵێت  " پێویستە وەرگێڕ بزانێت یابانیەك وەكو بەربەریەك پێناكەنێت , لە بەردەم دیمەنێكی دیاریكراودا زەردەخەنەى  ئینگلیزێك جیاوازە لەزەردەخەنەى فەرەنساییەك  ..."  , ئەگەر  ئەم نمونانە وەرگێڕینە سەر واقعی زمان و ڕۆشنبیرى كوردی . بۆنمونە ( گواستنەوەى دیمەنی ماچ گۆڕینەوەى كچێك لەگەڵ هاوڕێ كوڕەكەى لەپێشچاوی باوك و دایكی )  لەهەر كەڵچەرێكی ئەوروپیەوە بۆ سەر زمانی كوردی , هەموو ئەو جیاوازی وناكۆكیانە دێتـە رێگەى كە لە نێوان كەڵچەرى كوردی و وڵاتێكی ئەوروپیدا بۆماچ گۆڕینەوەى كچ و كوڕێك هەیە  , یان گواستنەوەى  جنێوى پاڵەوانی ڕۆمانێكی كوردی كە بە بەرامبەرەكەى ئەڵێت ( سەگی پیس ) بۆ سەر زمانی ئەمریكاییەكان كە بەچاوی ڕێز و هاوڕێیەتیەوە لەگەل َسەگدا مامەڵە ئەكەن .. هەمان ئەو  ناكۆكیانە دێتە ڕێگەى كە پێگەى سەگ وەكو ئاژەڵێكی ماڵى بەوەفاى خزمەتگوزار لاى ئەوان , هاوكات شتێكی گڵاوی نەعلەتی لاى ئێمەیش دروستى كردووە .. كەواتە وەرگێڕ هەر تەنها وشەو رستەو واتا ناكاتەكوردی , بەڵكو خەیاڵ و كۆنتێكست و هەموو ئەو پاشخانە رۆشنبیرى و مێژوییەیش دەگوازێـتەوە كە دەقەكەى لەسەر راگیراوە , ئەمە گەر بیەوێت بەڕاستی دەقێك بكاتە كوردی ..

 پرۆسەى ( بەكوردیكردن )كە بەشێكە لەهەر كارێكی وەرگێڕان و پێویستە دواین وێستگەى تێپەڕینی دەقەكە بێـت بۆ سەر زمانی كوردی , مەرج نیە بە هاوتەبای لەگەڵ هەموو وەرگیڕانێكدا دەرچێت , ئەشێـت دەقێك بەئەمانەتەوە و بەباشی وەرگێڕرابێـتە سەر زمانی  كوردی , بەڵام لە ئاستی (بەكوردیكدرن ) دا لاوازبێت , چونكە هەموو جارێك وەرگێڕەكان لەبەردەم وەرگیڕانی ڕستەیەكدا ئەو پرسیارەلەخۆیان ناكەن ( گەركوردێك ئەم گۆزارشەى دەربڕیایە  چۆنی ئەوت ؟ یاخود گەر كوردێك لەبەردەم ئەم هەڵوێستەدا توڕەبوایە چۆن جنێوى ئەدا و ... چۆن ئەگریا ؟) . 

 سروشتى ئەم پرۆسەى بەكوردی كردنە چەندە بۆ وەرگێڕ قورس و گران و ئاڵۆزە ,  دۆزینەوە و هەست پێكردنی بۆ خوێنەر ئەوەندە ئاسانە , زۆر جار هەر لەیەكەم ساتی خوێندنەوەدا ئەم كێشەیە خوێنەر ئەتۆرێنێت , یان بە جۆرێك سەرنجی ڕائەكێشێت تا تەواوكردنی دەقەكە بەخۆیەوە هەڵی ئەواسێت بێ ئەوەى تێبگات لەو ئەفسونە نهێنیەى چێژى خوێندنەوەى دەقەكەى هێندە شیرین كردووە لەلاى . لەكۆتایى ساڵانی نەوەتەكاندا بەهۆى هاوڕێیەكمەوە ڕۆمانی (نینا ) ى ( سابت رەحمان ) م دەست كەوت و خوێندمەوە كە حەمەكەریم عارف كردویەتیە كوردی , ئەگەر چی شڕۆڵى كتێبەكە و چاپەناشیرینەكەى بە ڕاستی ماندوكەر بوو , بەڵام  تاماوەیەكی زۆر نەم ئەتوانی تێبگەم لەو چێژەى خوێندنەوەى ئەو ڕۆمانە پێی ئەبەخشیم , ئەوكات باوەڕمان وەهابوو  مەیلى چەپڕەوی هەرزەكارانەى خۆمان واى كردووە ڕۆمانەكە بەو جۆرە شیرین بێـت بەلامانەوە .. بەڵام ئەوەى دواى چەند ساڵێكی ترخوێندنەوەى ڕۆمانەكە خۆى تێیگەیاندین جوانی وەرگێڕانەكەى و بە (كوردیكردن) ەكەى بوو , كە من زۆر درەنگ تێگەیشتم لەوەى چەندە زمانى دووهەم و جوان داڕشتنەوەى دەقێك , ئەشێت ئەدەب جوانتر بكات ..

 سێ ڕۆمان و سێ نمونەى جیاواز :

ڕۆمانی ( سەمفۆنیاى مردوەكان ) ی عباس معروفی , لە لایەن رزگار ئەمین نەژادەوە كراوەتە كوردی , ئەم رۆمانە وەك نمونەیەكی سەركەوتوی گواستنەوەى كۆنتێكستی چیرۆك و  گفتوگۆ و زنجیرەى روداوەكان دەر ئەكەوێت , ئەگەر چى بونیادی رستەكورتەكانی و شێوەى داڕشتنی خوازە و میتافۆرەكانی زۆر لە ژێركاریگەرى زمانە فارسیەكەیدایە .. بەڵام لێزانانە كۆى گشتى فەزا و حكایەت و روداوەكانی كردۆتە كوردی , بەجۆرێك من وەكوخوێنەرێك هەستم نەئەكرد ئەم ڕۆمانە چنراوی خەیاڵى نوسەرێكی فارسى زمانە . كەش و هەواى سۆزدارى ناو ڕوداوەكان , پەیوەندی نێوان كارەكتەرەكان و ئەو چارەنوسە تراژیدیەى چیرۆكى زۆربەیانی پێ كۆتایى ئەهات  , ئەو هەستەى لاى منی خوێنەر دروست كرد كە هەر بۆئەوە دانراوە ئەم وەرگێڕە بەم شوێواز و زمانەى ئێستاى بیكاتە كوردی , چۆنكە تۆنی چیرۆكبێژی دەقەكە و تەونی چنراوی ڕوداوەكانی و رەوتی درامی پەرەسەندنەكانی هێندە هەماهەنگە لەگەڵ ئەو شێوازە زمانەى بە كوردی دایڕشتۆتەوە , دەقەكوردیەكەى كردۆتە خاوەن تام و چێژو شێوازێكی تایبەت و جیاواز , كە تەنها بەم وەرگیڕانەیش ئەكرا شتی وەها دروست ببێـت .   

 رۆمانی ( شیكاگۆ ) عەلا ئەسوانی  , لە لایەن سەباح ئیسماعیل ەوە كراوەتە كوردی , لە بەر ئەوەى كەپێشتر دەقە عەرەبیەكەیم خوێندوەتەوە و دواتریش وەرگیڕانە كوردیەكەى , بێ دوودڵى  ئەوەى كاك سەباح كردویەتی  وەرگیڕانێكی داهێنەرانەی رۆمانەكەیە  . بەشێوەیەكی زۆر سەرسامكەر كردویەتیە كوردی , بێ ئەوەى هیچ لەو جوانی و تام و چێژە ئەدەبیەى لەدەست دابێت  كە نوسەر لە دەقە عەرەبیەكەیدا دایهێناوە . زمانی نوسینەكانی عەلا ئەسوانی ( لانی كەم لە شیكاگۆ و باڵەخانەى یاقوبیان ) زمانێكی زۆر تایبەتە , تا رادەیەك لە زمانی ئەو مۆدێلە نوسینەوە نزیكە كە ئەمڕۆ وەك ( پۆست مۆدێرنیست ) ناو دەبرێن و بەردەوام بە زمانسادەیى و بازاڕیبون لە گوزارش و درەبڕیندا تۆمەتبار ئەكرێن ,  هەموو ئەو شیعریەتە قوڵ و پاراو و ریتۆریكیەى   لە ڕۆمانی عەرەبیدا باوە و  خەڵكانی وەك ( حەیدەر حەیدەر و واسینی ئەعرەج و عبدالرحمن مونیف و ئەحلام مستەغانمی ... )شاكارى جوانیان پێ داهێناوە , لاى ئەم نوسەرە ئەگەر تەواو فەرامۆشیش نەكرابێت , ئەوا گۆڕاوە , چونكە ئەم بەزمانێكی سادەی ڕاپۆرتی و خوڵقاوی ناو ڕوداوە درامیەكانى ڕۆمانەكە دەقەكەى نوسیوە  , هەندێك جار وا هەست ئەكەین لە بەردەم گێڕانەوەى ڕیپۆرتێرى كەناڵێكی ئاسمانیداین ,  كە زۆر زیرەكانە وەرگێڕەكەى ئەم زمانە سادەى كرۆدتە كوردی , بەجۆرێك نە لەئاستی شیعریەت و ئەدەبیەتەكەى كەم كرۆدتەوە , نە باریشی كردووە بەشیعریەتێكى زیاتر لەوەى كە لەدەقەكە خۆیدا هەیە , تەنها ئەو كەسانەى ڕۆژێك لە ڕۆژان هەوڵی وەرگێڕانی ئەدەبیان داوە ئەزانن راگرتنی ئەم هاوسەنگیە چەندە قورس و گرانە . هەر ئەم وەرگێڕانە سەركەوتوەیش واى كردووە  وەك دەقێكی كوردی دەر بكەوێت , نەك ئەوەى كە سێك وەری گیڕابێـت بۆ سەر زمانی كوردی .

 رۆمانی (سەد ساڵ تەنیایى)  ماركیز , لەلایەن حەسەن رستگارەوە كراوەتە كوردی   , بێگومان كارێكی قورسە و ماندوبونێكی زۆرى وەرگێڕەكەى پێوە دیارە , لە بەر ئەوەى من هێشتا دەقەكەم بە زمانە رەسەنەكەى خۆى نەخوێندۆتەوە , ناتوانم لەبارەى ئەمانەت ودروستى وەرگێرانەكەیشیەوە هیچ بڵێم , بەڵام ئەوەى كە دەقەكوردیەكەى نیشانمان ئەدات , بەڕاستی نوسینێكە نەكراوەتە كوردی( وەك ئەوەى كوردێك نوسیبێتی ) , نە بە هیچ زمانێكی تریش ماوەتەوە  , یاخود كەمترین ئیشى لەسەركراوە بۆ ئەوەى بكریـَتە كوردی و پرۆسەى بەكوردیكردنی زۆر لاوازبووە   , لە هەندێك شوێندا واهەست ئەكەیت بە وشە كوردیەكان رستەى فارسی دروستكراوە , یان ئەوەى كراوەتە كوردی تەنها مانا فەرهەنگیەكانی وشەكانە, نەك ماناو خەیاڵ وكۆنتێكستى دەقەكە , بۆیە ئەم ڕۆمانە كە لە ئاستی جیهاندا وەك شاكارێكی ئەدەبى سەدەى رابردوو ناودەبرێت , كاتێك بەم كوردیە ئەیخوێنینەوە , زەحمەتە قەناعەت بەوە بكەین ئەمە یەكێكە لە ڕۆمانە بەناوبانگەكانی ماركیز . بەڕاستی شێوازە تایبەتەكەى مارگیز لەگێڕانەوەدا و  خەیاڵە دەوڵەمەندەكەى و گوزارشە جوانەكانی , لەم رۆمانەدا هێندە هەناسەكورت  و لاواز كراوە , ئەتوانین بڵێین تەواوى دەقەكەى شڵەژاندووە .

بۆچوون نووسین

ناردنی ئه‌م بابه‌ته‌ بۆ هاوڕێیه‌ك